Zjarr në Ballancë të Vitisë, zjarrfikësit në betejë me flakët për të shpëtuar arat me grurë

Viti – Një zjarr ka përfshirë këtë të diel sipërfaqe me bar të thatë në fshatin Ballancë të Komunës së Vitisë, ndërsa erërat e forta kanë rritur rrezikun e përhapjes së flakëve në zonat përreth.

Lajmin e ka bërë të ditur shefi i Njësisë Profesionale të Zjarrfikjes dhe Shpëtimit në Viti, Hetem Jakupi, i cili ka njoftuar se ekipet e zjarrfikësve ndodhen në terren dhe janë angazhuar maksimalisht për ta vënë situatën nën kontroll.

Sipas tij, prioriteti kryesor është mbrojtja e jetës dhe pronës së qytetarëve, si dhe parandalimi i përhapjes së zjarrit drejt arave me grurë, në mënyrë që të mos dëmtohet mundi i fermerëve.

“Për shkak të erërave të forta që po fryjnë, ekziston rreziku që zjarri të përhapet edhe më tej. Ekipet tona janë në terren dhe po bëjnë maksimumin për ta lokalizuar dhe shuar sa më shpejt zjarrin”, ka bërë të ditur Jakupi.

Ai u ka bërë thirrje qytetarëve të shmangin lëvizjet e panevojshme pranë zonës së përfshirë nga flakët, të mos ndezin zjarre në ambiente të hapura dhe të respektojnë udhëzimet e autoriteteve, me qëllim që të parandalohet përkeqësimi i situatës.

Zjarrfikësit shpresojnë që, falë angazhimit të ekipeve në terren, zjarri të vihet nën kontroll në kohën më të shkurtër të mundshme./rajonipress/