Zhvillohet ndeshja vëllazërore në mes Gjilanit e përfaqësueses së Çamërisë

Gjilan – Ndeshja miqësore e më tepër vëllazërore, në mes Gjilanit dhe Përfaqësueses së Çamërisë, është zhvilluar në stadiumin e qytetit në Gjilan në praninë e qindra shikuesve.

Shkallët e stadiumit i kishin vërshuar tifozët e Republikës së Çamërisë me veshje kombëtare e emblema të shtetit të Çamërisë, duke sjell emocione të veçanta tek të pranishmit duke sinjalizuar Republikën e Çamërisë.

Në fillim u intonua himni i Çamërisë dhe ai Kombëtar.

Mysafirët të cilët po simbolizojnë shtetin e Çamërisë, ishin tejet të lumtur dhe të respektuar nga ana e SC Gjilanit për mundësin e kësaj ndeshje futbollistike.

Arben Arkaxhiu, president i Federatës së Futbollit të Çamërisë, ka përshëndetur të pranishmit në emër të Arben Lotos, president i Çamërisë dhe ka theksuar se kjo ndeshje duhet të shërbejë për lidhjen e marrëdhënieve miqësore në mes shteteve tona.

Elena Kocaqi, përfaqësuese Diplomatike e Republikës së Çamërisë, tha se aktet e tilla i bashkojnë shqiptarët dhe dëshmojnë se populli çam nuk është i vetëm, kurse Maringlen Koqiu, përfaqësues i Republikës së Çamërisë për Marrëdhënie Ndërkombëtare dhe Selman Berisha, kryetar i Ballit Kombëtar të Kosovës, thanë se kjo është dëshmi se populli shqiptar gjithmonë i qëndron pranë njëri tjetrit.

Ndeshjen e fituan “bardh e kuqët” e Gjilanit me rezultat 4-1, ndërsa trajneri i Gjilanit, Sedat Pajaziti, kishte komponuar skuadrën me disa futbollist të rinjë, ndërsa trajneri i Përfaqësueses së Çamërisë, Arben Kasollime, një skuadër krejtësisht të re la përshtypje tejet të mira gjatë 90 minutave.

Në mesin e tifozëve të kësaj ndeshje patë emocione të veçanta për kontributin që po japin njerëzit me punën dhe sakrificën e tyre që ta jetësojnë Republikën e Çamërisë.

Gjatë kësaj ndeshje u shpalosën shumë mbishkrime siç ishin: Kosova – Republika e Çamërisë, Ushtria Çlirimtare e Çamërisë, ne jemi vëllezër, jemi një gjak, jemi një komb.

Në këtë ndeshje u panë edhe lot të mallëngjimit për sakrificën që janë duke bërë me shekuj njerëzit që të jetësojnë Republikën e Çamërisë./rajonipress/