Zhgënjehen mërgimtarët

Gjilan – Rruga Stublinë – Dobërqan ka dy vite që nuk bëhet e kalueshme nga ana e komunës dhe për pasojë mërgimtarët as këtë vit nuk mund t`i mbajnë takimet e vendlindjes.

Edhe pse zyrtarët komunal kanë premtuar se brezi kufitar do të jetë në top prioritetet kjo megjithatë nuk po vlen për mërgimtarët e fshatit Stublinë e Miresh. Rruga Stublinë – Miresh ka dy vite që është e pakalueshme për shkak se komuna nuk e ka hapur asnjëherë këtë rrugë e cila frekuentohet shumë me ardhjen e mërgimtarëve.

Për pasojë takimet e vendlindjes që mbahen kah mesi i korrikut rrezikohen të mos mbahen pikërisht se rruga është e dëmtuar tej mase. Rabiti një mërgimtar në Zvicër thotë se frekuentimi i rrugës Miresh – Stublinë është i pamundur. “Komuna duhet me eskavator ta hap këtë rrugë dhe ta bëjë të kalueshme. Që nga koha e Qemajl Mustafës kjo rrugë më nuk është riparuar asnjëherë” shprehet ai.

Lutfi Haziri ka premtuar se rrugët e treta do të rregullohen, por Enver Biqku zyrtar në shërbimet publike tha se kompania që mirëmban rrugët e treta nuk ka mundësi që të intervenojë për shkak se komuna i ka borxh.

Derisa të vendoset dhe të sqarohet se cila kompani duhet të përkujdeset për këto rrugë, mërgimtarët e Stublinës dhe Mireshit rrezikojnë mos ta realizojnë takimin e tyre tradicional./rajonipress/