Zhegrova shënon dhe asiston në fitoren e madhe të Baselit
Zhegrova ka shkëlqyer me gol dhe asist në fitoren 3-0 të Basel kundër Young Boys. Basel tani ka 33 pikë, Young Boys 34
Baseli e ka mposhtur liderin, Young Boys për t’iu afruar në një pikë në renditjen e Superligës së Zvicrës, raporton Gazeta Express.
Vendasit triumfuan me rezultat të pastër, 3-0, në një ndeshje ku shkëlqeu talenti i Kombëtares së Kosovës, Edon Zhegrova.
20-vjeçari asistoi për golin e parë të shënuar nga Arthur në minutën e 6-të, derisa vet realizoi një gol të bukur për 3-0 në minutën e 48-të.
Golin tjetër për Baselin e shënoi Omar Alderete në minutën e 13-të.
Zhegrova luajti 76′ minuta, para se të lëshojë vendin për Okafor.
Titullar ishte edhe Taulant Xhaka, derisa Ademi nuk ishte i ftuar.
Pas kësaj fitore, Baseli ka shkuar në kuotën e 33 pikëve, një më pak se Young Boys. /Gazeta Express/