Zhegra me kërkesa konkrete për Lutfi Hazirin

Gjilan – Zhegra si një ndër lokalitetet më të mëdha të Komunës së Gjilanit ndër të tjera ballafaqohet me problemet e rregullimit të transportit ndër urban. Për të funksionalizuar qarkullimin normal të autobusëve kërkojmë nga Lutfi Haziri që të cakton pikat ndalese të autobusëve, vendosjen e tabelave, shenjat e komunikacionit si dhe vendosjen e zebrave nëpër rrugë ka thënë Ruhan Kurteshi nga Iniciativa Qytetare e Zhegrës.

Ruhan Kurteshi nga Iniciativa Qytetare e Zhegrës (IQZH) ka nisur kërkesat e tij drejtuar autoriteteve lokale për të përmirësuar jetën e banorëve të Zhegrës, por edhe për të ulur kostot e shpenzimeve që krijohen nga transporti urban.

Kurteshi ka kërkuar nga Lutfi Haziri dhe drejtoria e shërbimeve publike zbritjen e biletës së autobusit. “Duke pasur parasysh se në të gjitha vendbanimet tjera në distancë të përafërt me Zhegrën bileta e autobusit kushton 0.50 €, kërkojmë nga Lutfi Haziri dhe drejtoria e shërbimeve publike që si organ kompetent që të ushtrojnë autoritetin e tyre dhe të ndikojnë te kompanitë “Zhegra Trans” dhe “Dritoni Trans” , të bëjnë zbritjen e biletës për Zhegër-Gjilan nga 0.70 € në 0.50 €, përkatësisht në vijën Shurdhan –Gjilan nga 1 € në 0.80 € ka thënë Ruhan Kurteshi në kërkesën e tij drejtuar autoritete komunale” ka thënë Kurteshi.

Kurteshi po ashtu ka kërkuar zbritjen e mujoreve për nxënës dhe qytetarët e tjerë që udhëtojnë në këto vija në 10 €, sa ishte deri më tani.

“Vitin që shkoi nga qarkullimi i “Zhegra Trans” janë hequr disa vija që ka dëmtuar transportin normal të nxënëseve dhe qytetarëve tjerë. Prandaj kërkojmë që “Zhegra Trans” t’i kthehen këto vija ose t`i marr ndonjë kompani tjetër” ka shtuar Kurteshi./rajonipress/