Zgjerohet aksioni për rregullimin e rrugës në Suharne, bëhen bashkë mërgimtarët

Gjilan – Krahas punimeve që po bëhen në rrugën e Suharnës, paralelisht po merr jehonë të madhe edhe dhënia vullnetare e mjeteve për nevojat e kësaj rruge. Të martën për nevojat e kësaj rruge 2000 euro i ka dhënë Xhevat Tahiri nga fshati Suharnë me punë në Zvicër. Xhevati ka mbi 40 vite që punon atje, por malli për vendlindjen e ka frymëzuar që ta ndihmojë aksionin tashmë të nisur nga veprimtari dhe aktivisti i palodhshëm Sevdail Haziri.

Xhevat Tahiri nga Suharna e Bujanocit është vullnetari i radhës në ndihmë të rregullimit të rrugës 15 kilometërshe në vendlindjen e tij.

Xhevati edhe pse në gjendje jo të mirë shëndetësore ka dhënë 2000 euro për nevojat e kësaj rruge.”Me vullnetin më të madh i bashkohem aksionit për rregullimin e rrugës. Unë jam larguar nga vendlindja gati rreth 40 vite, por malli për vendin kurrë nuk shteret. Nuk mund ta harrojë vendlindjen e as njerëzit tanë atje. Do ta përkrahim në maksimum aksionin e nisur nga Sevdail Haziri i cili po i jep gjallëri dhe jetë Malësisë së Bujanocit” u shpreh Tahiri.

Sevdail Haziri ndërkaq thotë se është i lumtur që aksioni po zgjerohet dhe po merr përmasa të mëdha solidariteti. “Me shumë kënaqësi po takohem me mërgimtar të cilët janë të interesuar të japin kontributin e tyre për rrugën e Suharnës. Unë e sigurojë mërgatën tonë se çdo donacion do të jetë transparentë dhe do të jemi të hapur për secilin. Fatmirësisht mua më besojnë bashkëvendësit e mi dhe kjo më jep edhe më shumë vullnet e motiv që ta bëjmë realitet rrugën tashmë të nisur. Rruga do të përfundojë ashtu siç dëshirojmë ne” tha Sevdail Haziri.

Ndërkohë për rrugën e Suharnës interesim ka shprehur edhe deputeti Shaip Kamberi. Kamberi për rajonipress tha se ndonëse buxheti është pjesë e komunës ai do të mundohet që ta mbështes me këshilltarët e tij në Kuvend asfaltimin e kësaj rruge që është jetike për banorët e kësaj zone.

Rajonipress është në pritje të përgjigjes edhe të kryetrarit të Bujanocit zotit Nagip Arifi.

E rëndësishme është që aksioni është zgjeruar me vullnetin më të mirë edhe të mërgatës, por edhe banorëve vendës. “Jetojë çdo sekondë të jetës për të parë të gjallëruar e me plotë banor atë vend ku jam lindur e rritur. Vendlindja është vend i shenjtë për mua dhe për të gjithë ne që jetojmë në kurbet” tha Sevdail Haziri./rajonipress/