Zgjedhjet për Këshill Kombëtar me 26 tetor

Medvegjë – Kryetari i Këshillit Kombëtar Shqiptar në Serbi, Galip Beqiri u ka bërë ftesë qytetarëve që të regjistrohen në listat e veçanta zgjedhore për të pasur të drejtë votimi në zgjedhjet që do të mbahen me 26 tetor.

Anëtarët e pakicave kombëtare duhet të regjistrohen në regjistër të veçantë zgjedhor më së voni deri me datën 23 gusht, që pastaj do të përmbyllet përkohësisht për të përcaktuar se cilat pakica do të votojnë drejtpërdrejt dhe cilat në mënyrë elektronike, transmeton Kosovapress.

Së paku 40% e popullatës sipas regjistrimit të popullsisë të vitit 2011 duhet të regjistrohet për të pasur të drejtë pjesëmarrjeje në zgjedhje të drejtpërdrejta.

Beqiri ka ftuar të gjitha partitë politike që të kandidojnë në zgjedhje, si mënyrë e vetme legjitime për të zgjedhur anëtarët e Këshillit Kombëtar dhe për të siguruar të gjitha të drejtat e shqiptarëve në Serbi, të cilat u takojnë sipas ligjit dhe standardeve ndërkombëtare.

Ai citohet të ketë thënë se nuk kishte asnjë informacion se sa votues janë regjistruar deri më tani, por beson se numri është i mjaftueshëm për të garantuar votim të drejtpërdrejtë. (mepress.info)