Zgjedhjet mbeten e vetmja zgjidhje

Nga Fatmir Matoshi – Pavarësia festohet në cilat do kushte që ndodhemi. Po shoh shumë opinione e mendime se në këtë 17 shkurt, Kosova nuk ka çka të festoj, dhe dëshirojë që në këtë kontest të jap një opinion timin.

Festat kombëtare e shtetërore janë festuar gjithmonë dhe në të gjitha kohërat, pavarësisht gjendjes dhe situatës në të cilën kemi qenë. E mbaj mend se si me 28 Nëntor të vitit 1993 në Koretin, ndërhyri policia serbe gjatë festimit që i bënim kësaj dite të shënuar dhe arrestoi vëllaun tim Hysen Matoshi, dhe kolegët e tij të aktiviteteve politike Naim Canaj e Muharrem Hoda. Ata na e prishën festën, por nuk e zbehën atë, vëllau dhe kolegët e tij u liruan pas 60 ditësh.

Ne kemi arsye të festojmë me 17 shkurt, sepse nuk jemi më të robëruar nga Serbia, pavarësisht se nuk e kemi ende të fortë shtetin ashtu si e dëshirojmë.

Protesta që është thirrur nuk e prish festën, ajo duhet të jetë paqësore dhe e dinjitetshme. Unë do të jem në Seancën e Kuvendit Komunal, sepse kam përgjegjësi institucionale, por shumë aktivist e anëtar të AKR-së do të jenë në këtë protestë, dhe ata sikurse që mendojë edhe unë, kanë arsye të protestojnë.

Pa hyrë në arsyet e përmendura shumë herë po rikujtojë vetëm dy që janë qenësore për mendimin tim dhe të shumë anëtarëve të degës së AKR-së.

E para, është konstatuar nga Gjykata Kushtetuese se marrëveshja mbi parimet për Asociacionin e Komunave me shumicë serbe është në kundërshtim me Kushtetutën e Kosovës. Në këtë rast nuk është morale që përmirësimet të bëhen nga po e njëjta qeveri, sepse po të ishte kështu ish Presidenti Sejdiu nuk do të jepte dorëheqjen, por do të përmirësonte shkeljen kushtetuese dhe do të largohej nga pozita e ngrirë e kryetarit të LDK-së, ose Presidenti Pacolli, i cili personalisht nuk kishte bërë asnjë shkelje do të qëndronte në postin e Presidentit dhe dorëheqjen do ta jepte ish kryetari i Kuvendit Jakup Krasniqi, i cili i shkeli rregulloren dhe kushtetutën.

E dyta, ky Kuvend i Republikës së Kosovës dhe kjo qeveri, u tregua Nënë për disa komuna dhe Njerkë për disa të tjera. Favorizoi komunat e caktuara në investime në dëm të disa komunave tjera e në mesin e tyre edhe në dëm të Komunës së Kamenicës.

Deputetët dhe ministrat duhet ta dinë se edhe në Kamenicë kanë marrë vota të shumta. Ata i kanë edhe votat e AKR-së, të cilat në proporcion u japin deputët më së shumti partive që janë në qeverisje, pasi qe ne nuk e kaluam pragun. Ne së bashku me gjithë strukturat udhëheqëse të Komunës, e kemi shtrirë dorën e bashkëpunimit me këtë qeveri, i kemi takuar shumë herë, i kemi pritur në mënyrë të dinjitetshme të gjithë qeveritarët që na kanë vizituar, porse e gjithë kjo nuk po jep rezultatet e pritura. Kjo qeveri nuk i bjen taman qytetarëve të Kamenicës, andaj është mirë që të kërkojë sërish besimin e tyre dhe të komunave tjera.

Gëzuar Ditën e Pavarësisë, ditën më të madhe të shtetit tonë Kosovës. Ne, vijmë e shkojmë, festojmë e protestojmë, qeveritë e shtetit e të komunave edhe mund të ndërrohen dhe kjo ka pak rëndësi, 17 shkurti, do të mbetet gjithmonë datë e shënuar dhe Ditëlindja e Shtetit Kosovë./rajonipress/