Zeqirja Rexhepi: Faleminderit Gjilan, mirënjohës krijuesve profesionist për vlerësimin

Gjilan – Zeqirja Rexhepit në kuadër të Manifestimit kulturor “Flaka e Janarit 2020”, iu nda çmimi blerës i Galerisë. Zeqirja Rexhepi për rajonipress tha se ndihet shumë i lumtur që këtë çmim e ka pranuar nga krijuesit gjilanas dhe nga bashkëvendësit e tij. Faleminderit nga zemra për këtë nder e respekt që ma kanë bërë u shpreh piktori Rexhepi.

Ka fituar çmime edhe me karakter ndërkombëtar dhe ka marrë pjesë në ekspozita me njerëz të famshëm e me autoritet, por një çmim i fituar nga vendlindja dhe nga Gjilani e ka bërë të ndihet krenar dhe të lumtur piktorin me famë ndërkombëtare Zeqirja Rexhepin.

Çmimi blerës i Flakës, të cilën e ndanë Shoqata e Arteve Pamore, njëzëri vendosi që çmimi blerës i Galerisë, t’i jepet artistit të zellshëm që jeton në Kanada, Zeqirija Rexhepi.

Piktori tashmë me famë ndërkombëtare Zeqirja Rexhepi nga Përlepnica e Gjilanit tha se po ndihet shumë krenar për këtë çmim. “Vërtet ndihem i gëzuar, u gëzova sepse ky çmim mu nda nga Gjilani, nga vendlindja dhe vendasit e mi. Kjo flet shumë sepse krijuesit e zellshëm kanë ditur të vlerësojnë punën time profesionale. Unë gjithçka që kam arritur në këtë jetë e kam bërë me punë, me ndërgjegje e përkushtim” u shpreh Zeqirja Rexhepi.

Zeqirja Rexhepi shprehet falënderues për jurinë, për ata krijues të sinqertë që ende përpiqen të japin nga vetja. “Unë jam pjesë e shumë zhvillimeve në jetën kulturore të Gjilanit, dhe bashkë me bashkëshorten time Bedrije Rexhepin hapat e parë i kemi nisur pikërisht në ato zyret e teatrit të qytetit dhe në sallën e teatrit. Kisha emocione të shumtë kur mu dha lajmi se jam fitues. Nuk është me rëndësi çmimi blerës sepse unë e kam të rregulluar jetën time këtu në Kanada, por ishte e rëndësishme të vlerësohesh nga profesionistët edhe kur nuk jeton e vepron fare në Kosovë” shprehet Rexhepi.

Ndryshe, Zeqirja Rexhepi me të drejtë mund të quhet një maestro në afirmimin e Kosovës në arenën diplomatike. Punën e tij të mrekullueshme, dhe kolosale e shfrytëzojë jo vetëm për vetën, por edhe për ta nderuar popullin e Kosovës dhe vet shtetin e saj.

Zeqirja Rexhepi piktor profesionist, ligjërues universitar, dizajner, skenarist filmash, ka bërë një emër të njohur në tërë Kanadanë e më gjerë.

Pakkush mund ta marrë me mend se Zeqirja Rexhepi në qytetin ku jeton vazhdon të mbetet një hero i dashur dhe i adhuruar nga komuniteti i atjeshëm, miqtë e shumë artistë e krijues.

Veprat e tij që ndodhen në shumë mure e kënde më të frekuentuara të Kanadasë, siç janë ato nëpër aeroporte e aviacione ushtarake lënë gjurmët e mira të një shqiptari intelektual e punëtorë./rajonipress/