Zenun Pajaziti: Nuk jam kandidat për Kryeministër, në asnjë variant

Mediat kanë spekuluar se PDK ka hedhur si ide krijimin e një qeverie gjithëpërfshirëse me kryeminister Zenun Pajazitin. Por, në një proponcim për Gazeten Express, Pajaziti e mohon një gjë të tillë.

“Partia Demokratike e ka kandidatin e vet për kryeministër, që është Hashim Thaçi. Ai është më meritori i Partisë Demokratikë për këtë pozitë dhe ashtu do të mbetet”, ka thënë për Express, Pajaziti.

Ai e konsideron të gjatë rrugën për të ardhur deri te Qeveria Gjithëpërfshirëse, ndërsa thekson se nominimi i Hashim Thaçit për kryeministër qëndron dhe nuk do të ketë të nominuar tjetër.

“Për të ardhur deri te ideja e qeverisë gjithëpërfshirëse duhet punë. Duhet të konstituohet Kuvendi, të zgjidhet kryesia e Kuvendit, e pastaj mund të flitet për një ide të tillë. Mirëpo, prapë po e përsëris, PDK’ja e ka mandatarin e saj për kryeministër dhe kjo qëndron. Nuk do të ketë nominim tjetër”.

Kur flet për zgjidhjen e krizës institucionale, Pajaziti thekson se zgjidhja nuk duhet të kërkohet nga PDK’ja. Ai i bën përgjegjëse partitë e koalicionit LDK-AAK-Nisma për bllokadën, dhe i këshillon ata që të tregohen më konstruktiv dhe t’i hapin rrugë ndërtimit të institucioneve.

“Mendoj që zgjidhja për krizën institucionale nuk duhet të kërkohet te PDK’ja. Janë partitë e koalicionit ato që duhet të tregohen më konstruktive dhe t’i hapin rrugë ndërtimit të institucioneve, pasi që janë ato të cilat duhet të jenë të vetëdijshme se duhet hapur rrugë për formimin e institucioneve”, ka thënë Pajaziti, për Express.