Zejnullahu: Për pesë vite asnjë punëtor i vdekur në vendin e punës

Gjilan – Basri Zejnullahu koordinator regjional i inspektoratit të punës në Gjilan thotë për rajonipress se në sektorin privat gjendja nuk është e keqe edhe pse tek kompanitë e ndërtimit ende ka mundësi që kushtet e punëtorëve të përmirësohen. Zejnullahu tha se që nga viti 2008 në regjionin e Gjilanit nuk ka asnjë rast të vdekjes së punëtorëve në vendet e tyre të punës.

Basri Zejnullahu i cili inspekton, përcjell dhe kontrollon kompanitë në sektorin privat duke përfshirë edhe ato të ndërtimit thotë se është i kënaqur deri diku me kushtet që ofron ky sektor për punëtorët gjatë kryerjes së punëve.

Zejnullahu tha se në Anamoravë gjendja e sigurisë në punë është relativisht e mirë.”Megjithatë nga punëdhënësit ende ka shkelje serioze derisa kushtet e punës janë larg standardeve profesionale dhe kritereve që parashohin shtetet evropiane” tha Zejnullahu.

Zejnullahu tha se gjendja duhet të përmirësohet tek kompanitë e ndërtimit të cilat nuk duhet për asnjë moment të harrojnë se janë të obliguara që punëtorët t`i pajisin me rroba, dorëza, helmetat etj. “Kompanitë e ndërtimit duhet të respektojnë këto kritere sepse në të kundërtën sanksionet janë të ashpra” tha ai.

Zejnullahu tha se fatmirësisht në regjionin e Gjilanit që nga vitit 2008 nuk ka pasur asnjë rast të vdekjes së punëtorëve në vendin e tyre të punës.

Zejnullahu ende është i pakënaqur me komunën e Gjilanit e cila edhe pse ka marrë vërejtje me shkrim se drejtoria e kadastrit nuk ka kushte elementare për punë dhe se duhet të zhvendoset prej aty, kjo vërejtje ende nuk është plotësuar. “Tani ekzistojnë zyra të mjaftueshme tek ish objekti i Gjykatës së Gjilanit dhe nuk e kam të qartë pse institucionet komunale nuk e bëjnë bartjen e punëtorëve. “Ne kemi vlerësuar se në ato hapësira nuk ekzistojnë as kushtet minimale për punë normale të këtyre zyrtarëve komunal si dhe në këtë formë dhe në këto hapësira është duke u rrezikuar shëndeti dhe siguria e këtyre punëtorëve të këtyre drejtorive” tha Zejnullahu./rajonipress/