Zbatimi i Ligjit për sigurime shëndetësore mund të shtyhet deri më 2016

Krijimi i sistemit informativ shëndetësor, hartimi i listës së shërbimeve bazike, miratimi i akteve nënligjore dhe krijimi i një liste të çmimeve të shërbimeve, janë disa nga veprimet që kanë ndikuar që zbatimi i Ligjit për sigurimet shëndetësore të mos fillojë në kohën e paraparë, shkruan sot Koha Ditore.

Gjithashtu në këtë vonesë ka ndikuar edhe fakti që në projektbuxhetin e këtij viti, për këtë ligj nuk janë ndarë 20 milionë euro siç ishte paraparë, por vetëm 10 milionë.

Pagesat për këtë ligj ishin paraparë të mblidheshin në tre muajt e fundit të vitit të kaluar, ndërkohë që zbatimi të fillonte nga janari i këtij viti. Por një gjë e tillë nuk ka ndodhur.

Në Ministrinë e Shëndetësisë nuk kanë dhënë ndonjë datë të saktë se kur do të mund të fillojë zbatimi i këtij ligji, për të cilin, tre muaj më përpara do të duhej të fillonte mbledhja e pagesave për sigurime.