Ymeri: Trump me deklaratën e tij, me apo pa vetëdije është në një vijë me qëndrimet e Serbisë

Analisti Visar Ymeri thotë se Trump nuk kishte të drejtë kur barazoi Kosovën dhe Serbinë në deklaratën për “vrasje masive”.

Ymeri në “Debat Plus” me Ermal Pandurin në RTV Dukagjini ka thënë se është shumë problematike qasja që ka Trump në raport me Kosovën gjatë fushatës elektorale.

“Trump gjatë një tubimi elektoral e përmendi se “shqiptarët dhe serbët janë vrarë mes vete”. Ky barazim që e bënë Trumpi me apo pa vetëdije është në një vijë me qëndrimet e Serbisë se të gjithë kanë vrarë në luftërat e ish-Jugosllavisë”, tha ai, përcjell Telegrafi.

Ish-deputeti thotë se shqiptarët dhe serbët nuk kanë qenë të barabartë në vrasjet masive siç i ka përmendur Trump.

Ai thotë se Kosova duhet të reagojë për këtë “deklaratë të pasaktë të Trumpit”.

Analisti thotë se është problematike nëse Trump mendon se serbët dhe shqiptarët nuk mund të bashkëjetojnë.

Ai thotë se kjo në mënyrë indirekte do t’i hapte rrugë ndarjes së Kosovës.

Ymeri thotë se Trump po pretendojë që ta paraqes veten si paçebërës në botë me marrëveshjet Kosovë-Serbi dhe ato që Izraeli bëri me vendet arabe.

Presidenti i SHBA-së, Donald Trump gjatë një tubimi zgjedhor në shtetin e Karolinës Veriore kishte thënë se administrata e udhëhequr nga ai është duke ndaluar vrasjet masive mes Kosovës dhe Serbisë.

“Ne jemi duke ndaluar vrasjet masive mes Kosovës dhe Serbisë. Ata kanë vrarë njëri-tjetrin për shumë vite”, ka deklaruar Trump./Telegrafi/