Kryeministri i vendit, Albin Kurti sot në një konferencë për media tha se inflacioni ka rënduar jetën e qytetarëve në Kosovë, prandaj do të fillojnë me një pako të re mbështetëse.
Ndërsa, sekretari i Sindikatës së Bashkuar të Arsimit, Shkencës dhe Teknologjisë (SBASHK), Ymer Ymeri ka thënë se ndihma ekonomike e cila është bërë për shkak të inflacionit nuk ka të bëjë asgjë me kërkesat e grevistëve.
Ymeri në një prononcim për Telegrafin ka thënë se nuk kanë asnjë arsye që të shqyrtojnë mundësinë nëse do të tërhiqen apo jo nga kërkesat e tyre.
Ai tha se greva në arsim vazhdon.
“Qeveria Kurti prej pakos emergjente i ka nda disa ndihma për shkak të inflacionit dhe s’ka të bëjë ajo kurrgjë me kërkesat tona. Për shkak të inflacionit e kanë bërë një ndarje të ndihmave ekonomike financiare. Kërkesa jonë ka qenë 100 euro rritje në pagën bazë deri në implementin e ligjit. D.m.th. s’ka të bëjë kjo kurrgjë me kërkesat tona dhe prandaj s’kemi asnjë arsye që të shqyrtojmë nëse do të tërhiqemi ose jo prej kërkesave. Greva vazhdon”, tha ai. /Telegrafi/
