Ymeri: Refuzimi i Kurtit për takim me Ramën, sjellje skandaloze e fëmijërore

Analisti politik, Visar Ymeri, e ka cilësuar skandaloze e fëmijërore, refuzimin e kryeministrit të Kosovës, Albin Kurti, të takohet me kryeministrin Edi Rama.

Ai në Debat Plus tha se Rama ka ardhur në Kosovë për Procesin e Berlinit dhe se Kurti edhe pse ishte më i zëshmi nga liderët e Ballkanit Perëndimor për këtë proces, nuk pranoi të takohet me të.

“Sjellja e sotme e Albin Kurtit, përveç skandaloze është edhe fëmijërore. Sot, Edi Rama ka ardhur së paku formalisht me një rol tjetër për Procesin e Berlinit… Erdhi në Kosovë nuk e takoi kryeministrin. Takimet nuk do të thotë se pajtohesh. Mirëpo, kryeministri i Kosovës ka qenë më i zëshmi pro Procesit të Berlinit, kundër Open Balkan. Tash nuk po e pret Ramën. Kë do ta presë prej Shqipërisë përpos Ramës?”, ka thënë ai.

Ymeri tha se ata që e akuzojnë kryeministrin e Shqipërisë e bëjnë për shkak se në Shqipëri nuk ka liderë opozitarë që mund ta sfidojnë atë.

Sipas tij, Kurti po përdoret në mënyrë që Rama të dobësohet politikisht në Shqipëri.

“Nuk mendoj që figura e Albin Kurtit duhet të përdoret në luftë ndaj Ramës. Kjo tregon për gjendjen politike të Shqipërisë, për ta luftuar Ramën, nuk ke lider opozitë, duhet ta marrësh kryeministrin e Kosovës. Çfarë do të bësh? Ta bëni kryeministër të Shqipërisë, Albin Kurtin, nuk mundeni”, ka thënë ai./RTV Dukagjini/