Ymeri inkurajon qytetarët dhe zyrtarët për të rritur pagesën e tatimit në pronë

Gjilan – Duke u mobilizuar dhe duke i kryer obligimet të cilat i kemi ne, duke e paguar tatimin në pronë ne bëhemi pjesë e përpjekjeve për ta përmirësuar cilësinë e jetesës në komunën tonë, tatimi në pronë është taksë vjetore komunale, të hyrat nga tatimi në pronë nevojiten për zhvillimin e infrastrukturës dhe jetesës më të mirë në komunën tonë është shprehur Bajrush Ymeri.

Në kuadër të Fushatës për rritjen e të hyrave vetanake në Komunën e Novobërdës Kryetari i Komunës Bajrush Ymeri mbajti takim me gjithë zyrtarët komunal për inkurajimin e pagesës së tatimit në pronë.

Kryetari i Komunës Bajrush Ymeri theksoi se ky takim është në vazhdën e takimeve tjera si rezultat i planit të veprimit që është aprovuar për rritjen e të hyrave vetanake dhe shprehet thellësisht i interesuar që në bashkëpunim me programin e USAID-it- DEMI të mbështetë fushatën për ngritjen e nivelit të grumbullimit të të hyrave vetanake.

“Duke ju falënderuar qytetarëve të kësaj komune në vitin 2008 dhe vitin 2011 ne si komunë jemi shpërblyer nga USAID/DEMI me dy shpërblime që janë dhënë dhe niveli i grumbullimit të hyrave vetanake ka shënuar trende pozitive dhe atë gjatë vitit 2012 komuna e Novobërdës ka realizuar të hyra në masë 145% më shumë në krahasim me vitin 2011. Duke u mobilizuar dhe duke i kryer obligimet të cilat i kemi ne, duke e paguar tatimin në pronë ne bëhemi pjesë e përpjekjeve për ta përmirësuar cilësinë e jetesës në komunën tonë, tatimi në pronë është taksë vjetore komunale, të hyrat nga tatimi në pronë nevojiten për zhvillimin e infrastrukturës dhe jetesës më të mirë në komunën tonë”u shpreh Ymeri.

Ndërsa Drejtori i Drejtorisë së Financave, Ekonomisë dhe Zhvillimit Gani Mustafa theksoi se jemi duke bashkëpunuar ngushtë me Programin DEMI rreth ngritjes së përformancës në rritjen e të hyrave vetanake, e sidomos në tatimin në pronë, prandaj dhe donatorët në këtë rast USAID-i gjithherë referohet në inkasimin dhe përformancës në tatim dhe kërkoj nga të gjithë zyrtarët komunal që të mobilizohemi dhe t`i inkurajojmë edhe qytetarët e tjerë që ta paguajmë tatimin në pronë ka thënë Mustafa./rajonipress/