Ylli shqiptar që po shkëlqen në Kroaci: Refuzova kombëtaren e Belgjikës

Mesfushori shqiptar, Lindon Selahi po kalon një formë të jashtëzakonshme në kampionatin kroat me skuadrën e Rijekës. 24-vjeçari është një nga emrat më të përfolur, ndërsa synon rikthimin në kombëtaren shqiptare.

Në përballjen e fundit në kampionat, Selahi arriti të shënonte një gol ndaj Varazdin, teksa skuadra e tij fitoi me rezultatin 3-1, duke u ngjitur në vendin e katërt.

Lindon Selahi ka folur ekskluzivisht për gazetarin e Euronews Albania, Enriko Gabaj ku ka rrëfyer synimet e këtij sezoni, ndërsa pika e dobët mbetet kombëtarja kuqezi.

Lindon, si po shkon ky sezon me skuadrën e Rijekës?

Ky sezon po shkon shumë mirë, sidomos në fazën e dytë të tij. Aktualisht kemi regjistruar ngjitje në tabelën e klasifikimit dhe gjendemi në vendin e katërt. Uroj që të bëjmë edhe më mirë.

Ndeshjen e fundit të kampionatit shënove, a e ke gjetur veten 100%?

Po, prej dy vitesh siç e dini unë jam titullar tek Rijeka.E ndiej veten shumë mirë në fushë, por edhe jashtë saj atmosfera është pozitive. Jam në formën time optimale.

Si duket gara e këtij viti në kampionatin kroat?

Pjesa e parë e sezonit nuk ishte më e mira e mundshme ose më saktë jo ajo që prisnim. Më tej kemi rikuperuar dhe kemio gjetur formën e duhur. Kemi pasur disa ndryshime, plot 3 trajnerë, ndërsa tashmë është krijuar stabiliteti. Po i fitojmë ndeshje dhe mendoj se jemi shumë mirë.

Jeni një nga lojtarët e përfolur për t’u thirrur në kombëtaren shqiptare, që tashmë siç e dini drejtohet nga Sylvinho, si ndiheni?

Unë jam shumë i kënaqur që puna dhe sakrifica është shpërblyer dhe tifozët e vlerësojnë pozitivisht. Më parë kam pasur mundësinë që të zgjedh përfaqësuesen e Belgjikës U21, të Kosovës apo Maqedonisë së Veriut. Unë vendosa të ndjek zemrën time, të luaj për flamurin kuqezi. Tani, gjithçka i takon trajnerit, sepse është ai që vendos.