Ylli Isufi viziton familjet e dëshmorëve

Gjilan – Kandidati i vetëm i pavarur për kryetar të Komunës së Gjilanit, Ylli Isufi, në kuadër të fushatës parazgjedhore, ka vizituar një numër të familjeve të dëshmorëve në Gjilan, si familjen e Nuhi Berishës, Rexhep Malës etj. Ai ka dëgjuar për së afërmi, për gjendjen e këtyre familjeve dhe për shqetësimet e familjeve të dëshmorëve në përgjithësi.

“Gjilani me rrethinë në të gjitha kohërat, e edhe në këtë të fundit, ka dhënë bijtë dhe bijat e veta më të mira për të arritur këtu ku jemi sot” ka thënë Isufi. “Dëshmorët e kanë kryer obligimin e tyre ndaj popullit e atdheut, por tani ka mbetur në dorën tonë që të kryejmë obligimet tona ndaj dëshmorëve dhe familjeve të tyre”.

Duke folur për pozitën e familjeve të dëshmorëve Isufi ka thënë se këto familje, edhe pas katërmbëdhjetë vite pas luftës nuk e kanë ende përkrahjen që e meritojnë. “Dëshmi e kësaj papërgjegjësie ndaj dëshmorëve të kombit, janë edhe varrezat e dëshmorëve në Gjilan. Përkundër punëve të kryera aty, ai memorial ende nuk është përfunduar, edhe pse kjo gjë duhej të bëhej shumë vite më parë”- ka thënë Isufi.

“Nuk mjaftojnë vetëm fjalët, por për të kryer obligimin ndaj tyre duhen vepra, ashtu siç kishin vepra e jo shumë fjalë dëshmorët, prandaj në programin tim, si kandidat për kryetar të Komunës së Gjilanit, një vend të veçantë e kanë pikërisht familjet e dëshmorëve, ndërsa memoriali në Kodrën e Dëshmorëve do të jetë një vend i shenjtë, një vend i ndërtuar mirë, një vend ku qytetarët tanë, e parasëgjithash fëmijët tanë do të krenohen me dëshmorët dhe do i nderojnë ata. Gjaku i derdhur i dëshmorëve më obligon jo vetëm moralisht që të punoj për të ndërtuar vendin tonë, sepse ky është amaneti i vet dëshmorëve” – ka thënë Isufi.

Ndërsa, Rexhep Berisha babai i dëshmorit Nuhi Berisha, e ka falënderuar , Ylli Isufi për vizitën dhe ka uruar që këto zgjedhje të shkojnë mbarë dhe të fitojnë më të mirët./rajonipress/