Ylli i Kosovës vjen me një lutje të veçantë për FIFA-n

Kapiteni i Përfaqësueses së Kosovës, Samir Ujkani është duke e përcjellë me vëmendje kongresin e FIFA-s.

Në këtë kongres të FIFA-s pritet të votohet për pranimin e Kosovës në organizatën më të madhe të futbollit.

Në një intervistë për Telegrafin, kapiteni i Kosovës, Samir Ujkani ka folur në lidhje me pranimin, duke thënë se populli i Kosovës e meriton këtë pranim.

“Pasi u pranuam në UEFA besoj që tani do të pranohemi edhe në FIFA”, deklaroi Ujkani për Telegrafin. “Ne si popull e duam futbollin dhe duam të luajmë në gara ndërkombëtare. Shpresoj në pranimin në FIFA pasi e meritojnë bashkëvendësit tanë që të përjetojnë ethet e garave evropiane”.

“Është një ditë e madhe për ne, shpresoj që ta gëzojmë dhe të punojmë shumë për ta përfaqësuar vendin tonë sa më mirë në botë”, deklaroi Ujkani.