Kryeministri i Shqipërisë, Edi Rama në mbyllje të fjalimit të tij në mbledhjen e përbashkët nuk kursej edhe disa batuta në lidhje me raportet e tij me kryeministrin Albin Kurti, që herë pas herë janë thënë që janë të krisura.
Ai në fund me shaka i tha Kurtit që “faleminderit që e ndale edhe shiun, se mund të na prishte këtë mbledhje”.
“Ishte një qen aty që lehte përpara se të fillonin himnet. Mirëpo, pas këndimit të himneve, edhe qeni nuk lehu më, çka, mbase, jep një mesazh për të ngjashmit e tij në botën e njerëzve, që kërkojnë të fusin xixa vazhdimisht mes nesh dhe kërkojnë të shikojnë me patjetër çështje të hapura mes meje dhe homologut këtu”, tha Rama.
Kryeministri i Shqiperise tutje shtoi se nuk ka krisje në raportet e tij me Kurtin.
“Nuk ka të tilla, sepse ne jemi shumë të hapur dhe çështjet për të cilat nuk merremi vesh, kemi kënaqësinë e madhe t’i ndajmë duke u marrë vesh të mos merremi vesh. Kështu që, me të falat përkatëse për qenin, unë e konsideroj të hapur këtë mbledhje”, tha Rama. /Telegrafi/
