Xhemajli: Pushteti në Viti po shantazhon simpatizantët e PDK-së

Gjilan – Në një reagim të degës së PDK-së në Viti thuhet se ka më shumë se dy vjet që po vazhdon presioni, ndjekja dhe shantazhimi i anëtarëve dhe simpatizantëve të PDK-së në administratën komunale të komunës së Vitisë të udhëhequr nga Nexhmedin Arifi dhe Hysen Ymeri dhe ky presion me të gjitha mjetet dhe format e mundshme po bëhet vetëm e vetëm pse janë në PDK dhe janë aktivist të saj dhe që në punën e tyre brenda komunës janë punëtorët më të mire dhe më të përkushtuar në punë dhe detyrat e tyre.

Sipas PDK-së së Vitisë presion, dhunë psikike, deri edhe kërcënime fizike dhe sulme të kësaj natyre po u bëhen gati të gjithë punëtorëve të cilët nuk janë në shërbim të kësaj udhëheqje për interesa personale dhe klanore, por në qendër të këtyre sulmeve janë veçanërisht këta punëtor: Fevzi Mehmeti-drejtor i Njësisë së Auditimit të Brendshëm, Ibadete Hyseni-Koordinatore e Njësisë për të Drejtat e Njeriu dhe Zyrtare për Barazi Gjinore, Florim Ibrahimi-Zyrtar i Lartë për Integrime, Abdullah Emini- Zyrtar Financiar, Lumnije Zuka-Zyrtare për Certifikim të Pagesave dhe punëtor të tjerë të cilët nuk janë të pakt.

Këtyre pesë punëtorëve, së fundi për arsye se ishin delegat në Kuvendin e Degës, Udhëheqësi i personelit Hysen Ymeri, në kundërshtim me të gjitha ligjet dhe rregulloret në fuqi u ka “shqiptuar” masa disiplinore dhe bile Ibadete Hyenin e cila pasi ka kërkuar shpjegim dhe bazë ligjore për masat e këtij udhëheqësi e ka keqtrajtuar, frikësuar dhe fyer rënd dinjitetin e saj, duke e sulmuar edhe fizikisht! Ka kanosur(kërcënuar) personin në prani të shumë zyrtarëve komunal të cilët janë detyruar të ndërhyjnë fizikisht për pengimin e tij në këtë sulm. Vepra këto të dënuara sipas ligjit për çka organet kompetente janë duke zhvilluar procedura kundër këtij sulmuesi i cili deri më sot nga udhëheqësi i tij i drejtpërdrejtë N. Arifi, nuk është kërkuar asnjë shpjegim dhe nuk është iniciuar asnjë procedurë disiplinore kundër tij sepse ai po kryen vetëm detyrat që ka marrë nga N. Arifi i cili është në krye të këtyre akteve kundër PDK-së (anëtarëve të saj) në Viti.

Në reagim thuhet se rregullorja nr.o4/2011 për procedurat disiplinore në shërbimin civil, për shkelje të lehta “mosrespektim i orarit të punës” nëse kanë ndodhur ka paraparë masa disiplinore të cilat mund të shqiptohen nga udhëheqësi apo mbikëqyrësi i drejtpërdrejtë por në asnjë formë nga udhëheqësi i personelit. Pra pasi këta punëtor secili ka mbikëqyrës të drejtpërdrejtë dhe vetëm ata nëse ka pasur mosrespektim të orarit të punës kanë mundur dhe e kanë obligim të merren me punëtorët e tyre dhe jo H. Ymeri i cili me N. Arifin komunën e ka shndërruar në vend ku më së paku u shërbehet qytetarëve të komunës me halle shumë dhe ku një pjesë e punëtorëve të përkëdhelur nga ky “klan zemunist” as nuk e shohin komunën me ditë të tëra dhe vinë e shkojnë sa here u teket atyre.

U bëjmë thirrje publike këtyre personave që janë në krye të kësaj dhune, presioni dhe shantazhi të përditshëm ndaj punëtorëve në komunë (sidomos nga PDK-ja) që është shembulli më i keq dhe unikat në Kosovë të ndalin këto dhe t’u kthehen punëve dhe përgjegjësive të tyre ligjore sepse në fund do të japin llogari para organeve për sundimin e ligjit në Kosovë.

U bëjmë thirrje publike (sepse me shkrim janë të informuara !) për të intervenuar urgjentisht Ministrisë së Pushtetit Lokal dhe Ministrisë së Administratës Publike dhe për të mbrojtur punëtorët dhe ligjshmërinë e cenuar (përdhosur) në Komunën e Vitisë nga N. Arifi dhe vartësi i tij i instaluar si Udhëheqës i Personelit edhe zbatuesi i urdhrave të tij Hysen Ymeri, sepse kjo që po ndodh në komunën e Vitisë është në kundërshtim me të gjitha ligjet dhe rregulloret në fuqi për shërbyesit civil të Kosovës, prandaj këto dy ministri posaçërisht duhet të intervenojnë në Viti për zbatimin e ligjit.

Kjo që ka ndodhur në komunën e Vitisë me sulmin fizik ndaj Zyrtares për Barazi Gjinore dhe Koordinatore e Njësisë për Drejtat e Njeriut, tregon saktë fytyrën e vërtet dhe karakterin e menaxhimin rrugaqëror në komunën e Vitisë, prandaj dega e PDK-së është e detyruar të reagoj ndaj këtij presioni, shantazhi dhe dhune edhe fizike ndaj anëtarëve dhe delegatëve të Kuvendit të Degës së PDK-së në Viti dhe kërkon që të ndërpriten urgjentisht këto veprime huliganeske.

Në të njëjtën kohë dega e PDK-së kërkon edhe nga organet e ndjekjes të angazhohen në zbardhjen e rastit të këtij keqtrajtimi gjatë ushtrimit të detyrës zyrtare të këtij zyrtari dhe që sulmon, frikëson dhe fyen dinjitetin e personave tjerë dhe kanos apo kërcënon seriozisht personat tjerë thuhet në reagimin e nënshkruare nga kryetari i degës së PDK-së në Viti, Daut Xhemajli./rajonipress/