Xhaka: “Zvicra mund të fitojë titullin e Evropianit 2016”

“Pse jo? Sigurisht, ka ekipe tjera që janë favorite dhe ne nuk bëjmë pjesë në mesin e tyre. Me pak fat dhe me performancë të mirë, ne mund ta marrim edhe titullin”

Granit Xhaka, futbollisti i kombëtares zvicerane, i cili luan për Borussia Mönchengladbach të Bundesligës di të bëjë nganjëherë deklarata të guximshme. Së fundi, në një intervistë dhënë gazetës gjermane “Rhenische Post” ai ka thënë se Zvicra “fare lehtë” mund të bëhet kampione në Evropianin 2016 që mbahet në Francë.

“Pse jo? Sigurisht, ka ekipe tjera që janë favorite dhe ne nuk bëjmë pjesë në mesin e tyre. Mirëpo unë me siguri nuk do ta bëj gati valixhen time për të qëndruar vetëm dhjetë ditë në Francë por për gjithë kohën sa zgjat kampionati. Me pak fat dhe me performancë të mirë, ne mund ta marrim edhe titullin”, ka thënë më tutje Xhaka.
Ai ka folur edhe për atë se si e përjeton ballafaqimin me vëllanë e tij, Taulantin, kundër të cilit do të luajë në ndeshjen e parë, Zvicër-Shqipëri.

“Është një situatë e veçantë, të cilën shumëkush nuk mund ta kuptojë. Kjo nuk ka të bëjë asgjë me Shqipërinë dhe Zvicrën por me atë se luan `kundër gjakut tënd`. Por ne e presim me kënaqësi këtë ndeshje”, ka përfunduar Granit Xhaka./albinfo/