Xhaka thyen dorën

Borussia – Mesfushori kosovar Granit Xhaka ka pësuar thyerje në shuplakën e dorës së majtë të shtunën në ndeshjen që skuadra e tij Borussia Moenchengladbachu e luajti pa gola në udhëtim ndaj Mainzit, përcjellin mediumet gjermane të dielën.

Xhaka ndonëse i lënduar luajti tërë ndeshjen. Ai u ndëshkua me karton të verdhë, ndërsa pati më së shumti kontakte me topin në radhët e Borussias në sfidën me Mainzin, plot 128 sosh. Të dielën Xhaka është paraqitur në kompleksin stërvitor të klubit me dorë të gipsuar.

Nuk është ende e qartë se sa do të mungojë. Në të njëjtën ditë kur u lëndua Xhaka, mesfushori kosovar Xherdan Shaqiri iu gëzua golit në fitoren e Bayernit ndaj Hamburgut. Shaqiri realizoi golin e fundit të Bayernit në fitoren 3:1, në minutën e 93-të.

Ai u aktivizua në këtë sfidë nga minuta e 78-të. Bayerni ka siguruar titullin e kampionit vjeshtor, pasi pas 16 xhirove ka 44 pikë. Ndërkohë Gladbachu gjendet në pozitën e katërt me 32 pikë.