Xhaka: Për fitore ndaj Armenisë duhet të japim gjithçka

Mesfushori kosovar i Kombëtares së Shqipërisë, Taulant Xhaka, nuk e di se kush do të jetë në ekipin startues për ndeshjen përballë përfaqësueses së Armenisë, të dielën.

Por, ai bën thirrje që, kushdo që të jetë, të japë maksimumin nga vetja.

Ndeshja eliminatore ndaj Armenisë zhvillohet të dielën në stadiumin “Elbasan Arena” (nis në orën 18:00), dhe për Shqipërinë është vlerësuar më e rëndësishmja e këtij cikli, meqë kjo skuadër llogaritet si konkurrentja më e madhe për pozitën e tretë në grup, të cilën e synon Shqipëria.

Kjo pozitë në fund siguron barazhin për kualifikim në Evropianin 2016, ndërkohë që dy pozitat e para sigurojnë kualifikimin direkt.

“Besoj në forcën e grupit. Kemi ekip të mirë, por për fitore, po qe nevoja duhet të japim edhe jetën në fushë. Është një nga ndeshjet e rëndësishme për ne, pasi ka edhe disa lojë tjera. Por, unë mendoj se në rast se fitojmë kundër Armenisë i kemi gjasat shumë të mira për kualifikim”, ka thënë Xhaka të mërkurën për gazetën./koha/