Xhaka: Nuk ik nga Gladbach

“Nuk kam ardhur në Mönchengladbach për të luajtur vetëm një gjysmë viti”, ka thënë mesfushori shqiptar

Futbollisti shqiptar i Zvicrës, prej disa muajsh i angazhuar për Borussia Mönchengladbach të bundesligës, Granit Xhaka nuk e ka ndërmend të lëshojë ekipin e tij. Së paku një braktisje e parakohshme nuk është opsion, ka bërë të qartë talenti shqiptar për mediet gjermane.

“Unë edhe në Bazel ia pata dalë dhe do t`ia dal edhe këtu. Nuk kam ardhur në Mönchengladbach për të luajtur vetëm një gjysmë viti, ka thënë mesfushori për gazetën “Der Westen”.

Por, duhet përkujtuar se që nga humbja 0:5 e skuadrës së tij nga Borussia Dortmund, në fund të muajit shtator, Xhaka është angazhuar vetëm si rezervist.

Ndërkohë për shërbimet e tij ka shprehur interesim Lazio e Romës dhe klube tjera.

“Më 3 janar i rifillojmë stërvitjet dhe prej aty do të fillojnë ndryshimet” ka thënë Xhaka, duke siguruar se do të luftojë për një vend në njëmbëdhjetëshin e parë të trajnerit Lucien Favre.(albinfo)