Xhaka “nuk do të presë përjetësisht” në bankën e rezervistëve

Granit Xhaka nuk është në ditët e tij më të mira. Plot 90 minuta i është dashur të shikojë nga tribuna se si luajnë bashkëlojtarët e tij të Borussia Mönchengladbach-ut kundër SC Freiburg. Duket se ai e ka humbur, tash për tash, vendin e titullarit në skuadrën e cila ka dhënë 8.5 milionë euro për ta pasur në radhët e saj.

Trajneri Lucien Favre, i cili po ashtu vjen nga Zvicra, thotë për mediet gjermane se Xhaka ende nuk është mësuar me mënyrën e lojës që praktikohet në bundesligën gjermane. Në anën tjetër, vetë Graniti ngul këmbë se edhe në Zvicër, gjegjësisht në Bazel është luajtur futboll kualitativ, kështu që ai nuk e kupton se ku është dallimi. Veç kësaj, ”Unë jam dëshmuar në moshën 20 vjeçare, duke u bërë lojtar titullar në kombëtaren e Zvicrës”, ka thënë ai për gazetën gjermane “Bild”.

“Unë do t`i tregoj trajnerit për çdo ditë në trajnime se e kam vendin në njëmbëdhjetëshen e parë dhe jo në bankën e rezervistëve”, ka shtuar ai.

Nëse kjo gjendje vazhdon, talenti shqiptar nga Zvicra “nuk do të presë përjetësisht”. Ka klube të mëdha futbolli që interesohen për shërbimet e tij. Njëri ndër to është Lazio i Romës. “Është një nderim për mua. Ata e dinë sa vlej unë”, shprehet i lumtur Xhaka për interesimin e italianëve. “Por unë tash nuk do të dorëzohen. Unë jam një lojtar ekipor dhe këtë e dinë të gjithë në Gladbach.

Në ditët në vijim Granit Xhaka do të kërkojë bisedë me trajnerin Favre. “Do ta pyes se si duket e ardhmja ime. Në rast se ai thotë se nuk është duke ecur , unë do të ndaj mendjen”. Parimisht ai dëshiron të vazhdojë në Borusia, edhe pse për fillim nuk i ka ecur as nga ana sportive dhe as nga ajo ndërnjerëzore. “Për mua deri më tash gjithmonë ka qenë mot me diell – ndërsa kjo fazë e vështirë do të më bëjë më të fortë mentalisht”, ka thënë ai.