Kalimi i Granit Xhakës nga Baseli te Borussia Mounchengladbachu është njëri prej transfereve të dështuara të këtij edicioni në Bundesliga 1, ka vlerësuar gazeta gjermane “Bild”.
Reprezentuesi i Zvicrës, gjatë verës kaloi nga skuadra zvicerane te Mounchengladbachu ku po luan pak në takimet e fundit. “Erdhi nga Baseli për 8,5 milionë euro. Pas debaklit 4:0 nga Bremeni në xhiron e tetë, humbi vendin e titullarit. Trajneri Lucien Favre ka thënë se Xhaka ende duhet të ambientohet me tempin e Bundesligës”, ka shkruar “Bild”.
Xhaka të mërkurën mbrëma nuk ishte përfshirë fare në skuadrën e Mounchengladbachut që fitoi 2:0 kundër Wolfsburgut në kuadër të javës së 14-të të kampionatit gjerman. Ai nuk ishte as në mesin e rezervistëve. Xhaka është paraqitur në 11 ndeshje këtë edicion, ndërsa ka realizuar një gol.
Tri paraqitjet e fundit i ka si zëvendësues. Ai ka lënë të hapur mundësinë që të largohet nga Borussia në janar.
