Xhaka mësoi shumë në stinorin e kaluar

Mesfushori kosovar Granit Xhaka vlerëson se përvoja e hidhur e edicionit të kaluar me Borussia Mönchengladbachun i ka ndihmuar shumë. Ai ka thënë se e rëndësishme ka qenë që krerët e klubit i kanë dhënë mbështetje të madhe për ta tejkaluar krizën që pati edicionin e parë në Gjermani. Tani Xhaka 21-vjeçar është bërë shumë i rëndësishëm për skuadrën gjermane që garon në Bundesliga 1.

“Viti i kaluar nuk ishte aspak i lehtë për mua. Por kjo përvojë më ka bërë mua personalisht shumë mirë. Jo vetëm në aspektin e futbollit, por edhe mentalisht. Ka qenë shumë e rëndësishme që ekipi ka qëndruar gjithmonë pas meje, më mbështeti. Tani jam në humor të mirë dhe vetëbesimi më është kthyer”, ka thënë Xhaka për “express.de”, transmeton Koha Ditore.

Ai me ekipin gjerman ka kontratë deri në qershor të vitit 2017. Xhaka në 13 paraqitje me fanellën e Mönchengladbachut ka asistuar një herë. “Është kënaqësi që ne kemi fituar pesë nga gjashtë ndeshjet e fundit dhe në shtëpi jemi fuqi. Ne kemi cilësi, mund të luajmë futboll të bukur dhe mund të konkurrojmë për pozitë të mirë në tabelë. Por, sezoni është i gjatë, ne kemi lënë prapa vetëm 14 ndeshje”, ka shtuar Xhaka.

Për Xhakën interesim kanë shprehur skuadra angleze Liverpool si dhe dy skuadrat italiane, Milan e Napoli.