Xhaka i dëshpëruar me humbjen nga Danimarka, kërkon patjetër fitore kundër Irlandës

Danimarka e ka mposhtur 1-0 Zvicrën për t’i marrë pikët e plota, fitore që i rrit gjasat e Danimarkës për ta siguruar një vend në EURO 2020.

Granit Xhaka i shkoi shumë pranë golit për helvetikët në pjesën e parë të ndeshjes, duke goditur nga jashtë zonës së portierit, mirëpo Kasper Schmeichel iu përgjigj asaj supergoditjeje me një super pritje që më pas topi prek edhe shtyllën, për t’ia mohuar golin mesfushorit të Arsenalit.

Pas kësaj fitoreje në stadiumin “Telia Parken”, Danimarka e kryeson Grupin D, me 12 pikë të fituara nga gjashtë ndeshjet e para, po aq sa Irlanda, ndërsa Zvicra radhitet e treta, me tetë pikë nga pesë ndeshjet e para.

Për këtë, Zvicrës i duhet patjetër fitorja të martën kundër Irlandës dhe Xhaka ka thënë se do të lënë edhe shpirtin në fushë.

“Morëm rezultat zhgënjyes mbrëmë në Danimarkë. Duhet të ngremë kokën lart dhe të luftojmë për ndeshjen e radhës të martën në Gjenevë kundër Irlandës. Faleminderit të gjithë fansave për mbështetjen e mrekullueshme në Kopenhagë”, ka shkruar Xhaka në Facebook. /Gazeta Express/