Xhaferi: Çdo koalicion duhet të ketë koordinim mes qendrës dhe degës, marrëveshja në Vushtrri u bë pa dijeninë tonë

Deputeti i LDK-së, Krenar Xhaferi, ka reaguar ndaj marrëveshjes së koalicionit të nënshkruar në Vushtrri ndërmjet Degës së LDK-së, të udhëhequr nga Xhafer Tahiri, dhe kandidatit të Vetëvendosjes për kryetar komune, Sylejman Meholli.

Xhaferi e quajti këtë veprim të nxituar dhe të pakonsultuar me strukturat qendrore të partisë.

“Unë mendoj që ka qenë një veprim i ngutshëm. Unë e shoh si të tillë, por besoj që do të jetë një veprim i izoluar,” deklaroi Xhaferi.

Ai theksoi se mungesa e koordinimit ndërmjet degës lokale dhe qendrës së partisë është problematike dhe mund të dëmtojë imazhin dhe funksionimin e LDK-së në nivel nacional.

“Çdo koalicion duhet të ketë koordinim të patjetërsueshëm mes qendrës dhe degës. Kur ka koordinim të rregullt mes strukturave, atëherë vijnë edhe rezultatet për partinë në nivel kombëtar,” u shpreh ai.

Deputeti Xhaferi zbuloi se as ai dhe as anëtarë të tjerë të shtabit qendror nuk kanë qenë të informuar për marrëveshjen apo për takimet e zhvilluara mes Xhafer Tahirit dhe Albin Kurtit.

“Unë nuk kam qenë i informuar për këto takime mes Tahirit dhe Kurtit. Për mua edhe vetë ky koalicion ka qenë një befasi. Ishte e papritur sepse ne ishim në Prishtinë duke mbajtur mbledhjen e shtabit dhe kur pamë lajmin, ishte befasuese,” tha ai.

Duke komentuar më tej për ndikimin e mundshëm të kësaj marrëveshjeje, Xhaferi tha se LDK-ja është e përqendruar në ruajtjen dhe fitoren e tetë komunave në zgjedhjet e ardhshme dhe nuk ka pasur nevojë për “veprime të tilla të njëanshme”.

“Fokusi ynë është të ruajmë 8 komunat dhe t’i fitojmë 8 të tjera. Në këtë pikë, nuk ka qenë e nevojshme të krijohen situata të tilla,” përfundoi ai. /Teve1