Wisner: Jam i zhgënjyer me ngecjet në Kosovë

Ish-diplomati amerikan, i përfshirë direkt në negociatat për pavarësinë e Kosovës, Frank Wisner, është shprehur me keqardhje për problemet e shumta me të cilat po ballafaqohet Kosova, ikjen e të rinjve dhe moszhvillimin e shtetit. Për lidershipin e Kosovës thotë se ata janë prodhuar nga veç votuesit e këtij vendi.

Ish-përfaqësuesi i presidentit të SHBA-së në negociatat për statusin e Kosovës, diplomati amerikan dhe ambasadori, Frank Wisner, është i zhgënjyer me ngecjen e Kosovës në shumë sfera. Ai në një intervistë ekskluzive dhënën gazetës “Zëri”, në New York, është shprehur me keqardhje për problemet e shumta me të cilat po ballafaqohet Kosova, ikjen e të rinjve dhe moszhvillimin e shtetit që me aq shumë mund u arrit të bëhet.

Për lidershipin e Kosovës thotë se ata janë prodhuar nga vetë votuesit e këtij vendi. “Lidershipi politik është ai të cilin e keni votuar, ju merrni atë që prodhon kultura juaj”, ka thënë Wisner për “Zërin”. Kurse për dështimet thotë se nuk duhet fajësuar askush tjetër pos politikën vendore.

“Mos fajësoni të tjerët aq shumë për dështimin, mos supozoni se të tjerët do t’i rregullojnë gjërat që ju duhet rregulluar vetë edhe nëse është vështirë për t’i rregulluar ato”, ka shtuar Wisner. Gjatë intervistës ai ka folur edhe për imazhin e Kosovës jashtë saj, radikalizmin dhe negociatat me Serbinë./zeri/