West Bromi, pas Sadikut

Armando Sadiku është bërë objektiv i shumë skuadrave evropiane. Sulmuesi shqiptar, i cili po shkëlqen me Luganon në Zvicër, pëlqehet nga ekipi anglez West Bromwich Albion, njofton ueb faqja tribalfootball.com.

Sadiku, i cili iu bashkua Luganon nga Lucarno gjatë kësaj vere, ka realizuar 9 gola nga 11 ndeshje këtë sezon. Përpos ekipit nga Premierliga, në ditët e fundit flitej se për përfaqësuesin shqiptar ka shfaqur interesim edhe kampioni aktual i Gjermanisë, Borussia Dortmund.

Kurse, kohë më parë, për 21 vjeçarin kishin lëvizur edhe ekipet italiane si Fiorentina, Catania, Siena e Chievo, plus ai gjerman Munich 1860.

Sadiku planifikon të qëndrojë në Zvicër së paku deri në fund të këtij sezoni, ndërsa destinacion më i mundshëm i tij është Italia, me disa skuadra nga Serie A që e presin duarhapur. Këtë vit Sadiku është bërë pjesë e rregullt e Kombëtares shqiptare, ku ka arritur të shënojë edhe gol.