Klubi gjerman Werder Bremen nuk ka mundur të përmbahet pa e shprehur gëzimin për rikthimin Milot Rashicës nga lëndimi, duke shfaqur edhe ndikimin e madh të kosovarit në skuadër dhe statistikat e tij madhështore gjatë vitit të fundit në ligë.
Rashica u rikthye nga lëndimi duke lënë gjurmë të menjëhershme në Bundesligë – ligën elitare gjermane –fundjavën e kaluar sepse me paraqitjen e tij të shkëlqyer, përfshirë golin fantastik, në barazimin e Werderit me Dortmundin, kosovari e zuri një vend në formacionin e javës, shkruan Gazeta Express.
Ylli i Kombëtares së Kosovës Rashica shënoi gol të mrekullueshëm në barazimin 2:2 të Werderit kundër Dortmundit në Signal Iduna Park, të shtunën.
Sot, pak orë para ndeshjes së radhës kundër Eintracht Frankfurt në Commerzbank-Arena në Frankfurt, Werderi ia ka kujtuar kundërshtarit statistikat e frikshme të yllit kosovar në vitin 2019 në Bundesligë.
Rashica ka qenë i përfshirë drejtpërdrejt në 14 gola në 19 ndeshjet e fundit në Bundesligë në vitin 2019: 9 gola dhe 5 asiste.
Anësori nga Vushtrria po rikthye nga një lëndim i gjatë muskulor dhe e bëri vetëm paraqitjen e parë si titullar që prej muajit gusht. Por, kjo nuk mundi ta parandalojë atë të shndrit kundër gjigantit Dortmund.
Mediumi gjerman, Sportschau e vlerësoi lart paraqitjen e 23-vjeçarit duke e zgjedhur atë në formacionin e javës në Bundesligë.
Sportschau e ka lartësuar Rashicën si lojtar me klasë të shtuar dhe si një aset të vërtetë për Werderin.
Paraqitje e së shtunës tregon se kosovari e ka lënë pas lëndimin në kofshën e këmbës së majtë, të cilin e pësoi në një ndeshje të Werderit ndaj Fortuna Dusseldorfit në Bundesligë kah mesi i muajit gusht. /Gazeta Express/
