VV ankohet se nuk u ndërtuan varrezat e dëshmorëve

Gjilan – Shemsi Syla, nga Lëvizja Vetëvendosje, thotë se as qeverisja e kaluar e as kjo e tashmja nuk bënë atë që duhej dhe që kishin premtuar sa u përket varrezave të dëshmorëve.

“Në Varrezat e dëshmorëve në Gjilan shkohet me ndjenjat e frikës dhe të turpit. Aty mund të shohësh pamje të tmerrshme, andaj çoroditja që pamë aty na bëri që të ngremë zërin”, thotë Shemsi Syla, që thotë se aty pushojnë njerëzit që më së shumti dhanë për lirinë e Gjilanit, janë eshtrat e 52 dëshmorëve, që nga Kadri Zeka, Rexhep Mala, Nuhi Berisha, komandanti i parë i ZOK-ut Abdullah Tahiri, Nushja e Tefiku dhe mbi 40 dëshmorë të tjerë.

Fajin për këtë gjendje, Syla ia hodhi pushtetit të kaluar, i cili pati në udhëheqje edhe bashkëluftëtarë të dëshmorëve dhe që thirreshin në vlerat e luftës dhe të cilët lanë mandatin bashkë me amanetin e parealizuar.

Syla nuk amnistoi as pushtetin e tashëm në Gjilan, që nuk lëvizi për asnjë milimetër në këtë drejtim. Sipas Sylës, dëshmorët e lirisë dhe familjet e tyre nuk e merituan këtë trajtim.

Syla, thotë të jetë edhe më i brengosur se në qeverisje me Gjilanin pati edhe ish- luftëtarët të lirisë dhe kjo më shumë e ngjall brengën për punën që s’u bë, sepse ata dhanë fjalë e betime e realisht nuk bënë asgjë./rajonipress/