VV, AAK-së: Paramendoni me kë po bëni koalicion

Lëvizja Vetëvendosje vlerëson se kthimi i Ramush Haradinaj është i mirë për skenën politike e veçanërisht për AAK-në.

Sipas tyre, me vendimin për pafajësinë e Haradinajt dhe dy bashkëluftëtarëve të tij, edhe një herë u dëshmua se lufta e UÇK-së ka qenë e pastër. E kur kanë folur për pjesën politike, drejtues të Vetëvendosjes kanë drejtuar një pyetje drejt AAK-së: ‘Paramendoni me kënd po doni me ba koalicion?’.

Nënkryetari i Vetëvendosjes, Shpend Ahmeti ka thënë se AAK-ja i din punët e tyre, por që, sipas tij, me njerëzit aktual në udhëheqje nuk ka as Qeveri të mirë e as forcim.

“Nuk mund të mos them, se si AAK-ja po mendon të hyjë në koalicion me këta njerëz. Për mua kjo është paksa e çuditshme. Nuk e di unë a forcohet a dobësohet sepse në fund të fundit janë qëndrimet dhe vendimet e tyre, por mendojë se me këta njerëz nuk ka Qeveri e as forcim. Është pyetje që ja drejtojë, se kur po komentojmë po na thonë pse po përziheni, kjo është pyetje legjitime që unë si qytetarë ja bëjë AAK-së: Paramendoni me kënd po doni me hy në koalicion, me kënd po doni me hy?”, ka thënë ai.

Lëvizja Vetëvendosje thotë se është mirë që u kthye Ramushi, ngase, sipas tyre, do të dihen vendimet e AAK-së, ngase si pretekst gjithmonë kanë pasur mungesën e liderit. /kosovapress/

Shpërndaje.
© RAJONIPRESS