Vrasja në Vlorë, e moshuara: Krismat e armëve na tmerruan, na kujtuan ‘97-ën

Vrasja e trefishtë që ndodhi dje, ka shokuar banorët e lagjes “Çole” në qytetin e Vlorës. Sipas tyre, vrasja e tre të rinjve u ka risjellë në kujtesë vitin e mbrapshtë ‘97-të. E moshuara, Ruhije Lati, e cila jeton në këtë lagje, në një intervistë për “GSH” tha se krismat e armëve tmerruan gjithë banorët e lagjes, pasi u kujtuan ngjarjet e vitit 1997

Ku ndodheshit në momentin që qëlluan me armë?
Isha brenda në shtëpi kur dëgjova disa krisma, të cilat zgjatën disa minuta.

Nga e kuptuat që ishin krisma armësh?

Të jetosh në lagjen “Çole” për shumë vite e kupton ndryshimin e krismës së armëve nga fishekzjarrët. Krismat që dëgjova sot, dhe të cilat na tmerruan, më kujtuan ‘97-ën.

Po më pas, çfarë ndodhi?

E tmerruar dola në ballkon dhe pashë disa makina që ikën me shpejtësi e të tjera që lëviznin pas tyre. E kuptova që diçka kishte ndodhur. Më pas mësova se kishin mbetur tre të vrarë.

Njihni ndonjë prej viktimave?

Nuk e di kush janë të tjerët, por më thanë vetëm për djalin e Bilbilit (Haki Rakipaj). Familja e tij është një familje e nderuar në lagje, e ardhur këtu te pallati i ri kohët e fundit.