“Vrasësi” i komuniteteve!

Nga Lavdim Hamidi – Aleksandër Jabllanoviq edhe nëse de jure ende është ministër për Komunitete dhe Kthim në Qeverinë e Kosovës, ai de facto është i shkarkuar nga drejtimi i këtij dikasteri në ekzekutiv.

Pas disa protestave të mbajtura në vend, fillimisht të organizuara nga Shoqata “Thirrjet e Nënave” e më pas edhe nga partitë opozitare, të cilat eskaluan në dhunë mes policëve dhe protestuesve, as kryeministri Isa Mustafa nuk mund t’ia mbajë të palëkundur Jabllanoviqit “kolltukun” e ministrit, kur për shkak të mosshkarkimit të tij vendi po rrëshqet drejt destabilitetit, situatë kjo që nuk i konvenon askujt, madje as serbëve.

Kreu i Listës “Srpska” përfundimisht nuk mund të jetë edhe më tutje ministër i Komuniteteve, kur pas deklaratës që i ka quajtur nënat gjakovare egërsira, vetëm se i ka hasmëruar dy komunitetet kryesore në vend, atë shqiptar dhe serb, duke u shndërruar kështu në shkatërrues të harmonisë false ndërmjet komuniteteve.

Ai mund edhe të mos e pranojë shkarkimin nga një kryeministër i Kosovës, shtet ky të cilin nuk e pranon Serbia, prandaj me shumë gjasë do të vendosë për dorëheqje nga detyra para protestës tjetër që do të mbahet të mërkurën e ardhshme, me arsyetimin se deklarata e tij për nënat gjakovare është keqpërdorur nga partitë opozitare.
Megjithatë, efekti do të arrihet.

Jabllanoviq, i cili e ka fyer rëndë një pjesë të ndjeshme të shoqërisë, nuk do të jetë ministër në Qeverinë “Mustafa” dhe njëkohësisht të gjithë ministrat e partisë së tij do të jenë shumë më të kujdesshëm në deklaratat e tyre në raport me komunitetet, për pajtimin e së cilëve që një dekadë e gjysmë institucionet ndërkombëtare në vend kanë shpenzuar shumë para dhe energji.

Madje, për ta përshpejtuar procesin e shkarkimit apo dorëheqjes së Jabllanoviqit duhet të kontribuojnë edhe ndërkombëtarët, duke bërë presion tek kryeministri i Serbisë, Aleksandër Vuçiq, me arsyetimin se me të në krye të Ministrisë për Kthim dhe Komunitete do të jetë shumë më i vështirë procesi i kthimit të serbëve në Kosovë dhe po aq sa edhe pajtimi mes komuniteteve, e cila gjë synohet të arrihet edhe nëpërmjet bisedimeve mes palës kosovare dhe asaj serbe në Bruksel.

Në asnjë mënyrë nuk duhet të kalkulohet se largimi i Jabllanoviqit mund ta nxjerrë nga institucionet Listën “Srpska”, e cila përkrahet nga Beogradi, sepse një subjekt politik që i ka dhjetë deputetë në Parlamentin e Kosovës shumë lehtë do të mundë ta gjejë pasardhësin e Jabllanoviqit në krye të Ministrisë.

Serbët dhe përfaqësuesit e tyre politikë asnjëherë deri më tani nuk kanë përbërë kurrfarë pengese për partitë politike të shqiptarëve në Kosovë, qoftë edhe për ato të opozitës, pasi që kërkesa për largimin e ndonjë ministri serb nga Qeveria e Kosovës, si për Jabllanoviqin, nuk ka pasur asnjëherë deri më tani.

Ata përpos që i kanë pranuar institucionet e Kosovës, njëkohësisht kanë qenë shumë të kujdesshëm në deklaratat e tyre publike në raport me të gjitha komunitetet që jetojnë në vend, të cilat gabime i bëri Jabllanoviqi në muajin e parë të pjesëmarrjes në ekzekutivin e vendit.
Të gjithë ministrat në Qeverinë e Kosovës, qoftë edhe ata të Listës “Srpska”, në të ardhmen duhet të jenë më të kujdesshëm me deklaratat e tyre, në mënyrë që të mos i “vrasin” ndjenjat e komuniteteve. E kujdes maksimal në këtë drejtim duhet të ketë sidomos ministri i ri për Komunitete.