Von Cramon: Që Samiti i Parisit të ketë sukses Kosovës duhet t’i hiqen vizat

Deputeti zviceran dhe nënkryetari i Partisë Socialdemokrate të Zvicrës, Cedri Wermuth, ka mbajtur një diskutim virtual së bashku me ish-kryeministrin Albin Kurti, kryetaren e Kuvendit Vjosa Osmanin dhe eurodeputeten Viola von Cramon lidhur me gjendjen politike në Kosovë dhe të ardhmen e vendit.

Një nga temat që u diskutua ishte edhe liberalizimi i vizave për Kosovën, për të cilën bashkëbiseduesit u pajtuan se duhet të ndodhë sa më parë, shkruan EO-ja.

Kryetarja e Kuvendit tha se është hipokrizi që Bashkimi Evropian të mos japë dritën e gjelbër për Kosovën kur dihet se kushtet për liberalizim të vizave janë plotësuar.

“Është hipokrizi që Bashkimi Evropian të mos përmbushë pjesën e saj për liberalizmin të vizave, sidomos pas rekomandimit të Komisioni Evropian për përmbushjen e kushteve për Kosovën”, tha Osmani.

Ndërkaq, raportuesja për Kosovën në PE, Viola von Cramon, tha se pajtohet që reputacioni i BE-së karshi Kosovës sa i përket liberalizimit të vizave është dëmtuar.

Von Cramon shtoi se presidenti i Francës, Emmanuel Macron, ka dëshirë që Samiti i Parisit të jetë i suksesshëm dhe për të ofruar diçka pas këtij samiti duhet të jetë pikërisht liberalizimi i vizave për Kosovën.

“Presidenti i Francës ka interes që Samiti i Parisit, i cili është parashikuar të mbahet në korrik, të jetë i suksesshëm, një sukses i samitit do të thotë të ofrohet diçka. Unë shpresoj që presidenti i Francës, Emmanuel Macron, e kupton nëse dëshiron që të ketë sukses nga Samiti i Paris, parakusht i kësaj duhet të jetë heqja e vizave për Kosovën. Gjithçka varet nga liberalizimi, ekonomia, gjenerata e re e njerëzve në Kosovë. Është jo e drejtë që shtetet anëtare të bllokojnë liberalizimin e vizave dhe heqja e regjimit të vizave duhet të ndodhë sa më parë”, është shprehur ajo.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).