Volejbollistet e Dritës zhvillojnë ndeshjen e CEP kupë në Zvicër

Gjilan – Volejbollistet e Dritës pas eliminimit në Ligën e Kampionëve nga skuadra e Bullgarisë Mariza e Plovdivit nesër zhvillojnë ndeshjen me skuadrën nga Zvicra VFM Franches Montagnes.

Trajneri Lorik Ilazi tha se të gjitha volejbollistet të cilat i ka në dispozicion kanë mbërri në Zvicër pa asnjë problem. Volejbollistet e Dritës i ka pritur kryetari dhe donatori i këtij klubi Valon Murseli së bashku me Albert Bunjakun.

Trajneri Lorik Ilazi para kësaj sfide ndërkombëtare ka bërë të ditur se kanë punuar mjaft mirë për këtë ndeshje. “Kemi të bëjmë me një skuadër shumë cilësore e cila në radhët e saja ka volejbolliste shumë cilësore, por sidoqoftë ky vit për skuadrën tonë ka qenë një vit i ndërkombëtarizimit duke marrë përvoja të mëdha në arenën ndërkombëtare në këtij takimi do t`i qasemi ashtu siç dimë dhe mundemi shpresoj në ndonjë rezultat pozitiv”.

Ndeshja e kthimit do të zhvillohet në Gjilan pas një jave./rajonipress/