Vokrri: Faleminderit atyre që ishin për ne, faleminderit edhe atyre që ishin kundër

Roli i Fadil Vokrrit për pranimin e Kosovës në UEFA është vlerësuar i madh nga gazeta e njohur kroate Jutarnji List.

Vokrri ka dhënë një intervistë për gazetën, në të cilën është shprehur për shumë çështje. Ai është pyetur nëse të gjitha federatat e vendeve të ish-Jugosllavisë, me përjashtim të Serbisë, kanë votuar për pranimin e Kosovës në UEFA.

Ndonëse Mali i Zi kishte lënë të kuptohej se ka votuar kundër, kreu i FFK-së ka dhënë përgjigje që shkon në drejtim të krijimit të raporteve miqësore me vendet e rajonit.

“Votimi ishte i fshehtë, por parashikoj që po. Faleminderit të gjithë atyre që ishin për ne, faleminderit edhe atyre që ishin kundër. Kjo tani nuk është e rëndësishme. Vizioni ynë është bërë i dukshëm, i vërtetë. Ne jemi brenda”.

“Gjatë kemi pritur, shumë kemi luftuar për pavarësi në futboll. Ndeshja është pranë fundit, vetëm të na pranojë edhe FIFA që të marrim frymë lirshëm, të shijojmë futbollin pa stres”, ka thënë Vokrri.