Vllaznia dhe Drenica ndajnë pikët

Gjilan – Ndeshja e mbetur e javës së 20-të, në Superligën e Kosovës në futboll, e cila është dashur të zhvillohet dje është zhvilluar sot, pasiqë fusha e futbollit dje ishte e mbuluar me borë.

Për tu zhvilluar ndeshja së paku në kushte optimale, tifozët e Vllaznisë “Tigrat” dhe disa punëtor që nga orët e hershme të paradites së sotme me iniciativën e tyre aq sa kanë mundur e kanë pastruar tapetin e blertë nga bora.

Në kushte jashtëzakonisht të vështira në praninë e 300 shikuesve, “Tigrat” e Vllaznisë dhe disa dhjetëra tifoz të Drenicës “Shqiponjat e Zeza”, nuk panë ndonjë lojë të mirë pasiqë dy skuadrat gjatë tërë 90 minutave kryesisht u përqendruan në gjysmë të fushës pa raste shënimi.

Skuadra e Vllaznisë së Pozheranit kishte më tepër nga loja, por në momentet vendimtare aksionet e tyre përfundonin para portës së portierit të Drenicës, Flamur Nezirit.

“Kuq e zinjët” e Drenicës, nuk rrezikuan asnjëherë seriozisht portën e portierit të Vllaznisë, Arlind Gashit.

Në ndeshjen e javës së 21-të, Vllaznia edhe njëherë takohet si nikoqire duke e pritur Besën e Pejës, ndërsa Drenica
do të jetë nikoqire e Gjilanit në Skenderaj.

Vllaznia edhe më tutje është e fundit në tabelë me 9 pikë, ndërsa Drenica pozicionohet ne pozitën e 8 me 30 pikë./rajonipress/