Vllasi: Kosova është më shumë prezente institucionalisht në veri

Juristi, Azem Vllasi ka thënë se situata në veri të Kosovës, është dukshëm më e mirë se në vitet e kaluara.

Ai madje ka vlerësuar se Kosova ka më shumë prezencë institucionale në veri.

“Kosova është më institucionalisht prezente edhe pse situata është brishtë. Qytetarëve u kanë ardhë të hunda bandat e Radoiçiqit. Situata është dukshëm më e mirë por duhet të jemi sy qelë dhe pas parasysh se Serbia gjithmonë synon të organizojë provokime apo akte të ndryshme siç ishte ajo në Banjskë, për ta destabilizuar situatën”, ka thënë Vllasi në Tëvë 1.

Ai ka thënë se ndikimi i grupeve kriminale dhe Listës Serbe atje është zvogëluar dukshëm.

Vllasi ka thënë se Qeveria e Kosovës ka bërë mirë që ka insistuar në shtrirjen e sovranitetit atje, por ka thënë se ka bërë disa gabime në hapa, ku për disa çështja nuk është koordinuar me parterët ndërkombëtar.

Një vit pas zgjedhjes së kryetarëve shqiptarë, sot katër kryetarët e komunave të veriut të vendit ofrojnë shërbime nga objektet e komunës.

Serbë lokal dhe grupet serbe kishin organizuar protesta të dhunshme për të kundërshtuar hyrjen e kryetarëve të zgjedhur shqiptarë në objektet e komunës.

Më 29 maj të vitit të kaluar afër 100 ushtarë të KFOR-it kishin pësuar lëndime pas sulmeve të protestueseve.

Nga sulmet e grupeve ekstrem nuk kishin shpëtuar as pjesëtarët e Policisë së Kosovës dhe përfaqësues të medieve.