Vjosa Osmani: Koalicioni me PDK-në do ta shkatërronte LDK-në

Deputetja e Lidhjes Demokratike të Kosovës (LDK),Vjosa Osmani, në emisionin “Info – Magazine” të Klan Kosovës, ka theksuar se janë të pavërteta lajmet se lideri i LDK-së, Isa Mustafa do të takohet me të parin e Partisë Demokratike të Kosovës (PDK), Hashim Thaçi, gjatë qëndrimit të tyre në Bruksel. Ajo gjithashtu është shprehur kundër koalicionit me PDK-në, i cili sipas saj do ta shkatërronte LDK-në.

Osmani ka thënë se “ajo çka është me rëndësi, është se nuk do të ketë takim Thaçi – Mustafa”.

“Në qoftë se do ta shihnim të nevojshëm takimin me PDK-në, do ta realizonim atë takim edhe në Kosovë. Ne tashmë i kemi zgjedhur partnerët tanë të koalicionit, që janë Blloku VLAN, me të cilët do ta ndërtojmë Qeverinë e Kosovës, ku shpresojmë se do të hyjnë edhe pakicat. Kanë kaluar me tepër se pesë muaj dhe ne së bashku me partnerët tonë, jemi pajtuar se duhet ta ndryshojmë mënyrën e deritanishme të qeverisjes”, ka theksuar Osmani.

Ajo ka thënë se çdo përfshirje e PDK-së në koalicionin do të ishte kundër kërkesave të elektoratit, respektivisht do të ishte kundër atyre që na kanë votuar neve si parti.

“Ka qenë kërkesa e elektoratit që koalicion PDK – LDK do ta shkatërronte LDK-në si parti dhe të ardhmen e Kosovës. Unë mendoj se nëse dikush e konsideron një koalicion të mundshëm LDK- PDK, atëherë ata persona nuk shohin përtej hundës së tyre. Ky ka qene ndër premtimet kryesore (mos hyrja në koalicion me PDK-në) që e kemi dhenë gjatë fushatës. Ne kemi kërkuar falje publikisht për këtë gabim (hyrjen në qeveri së bashku me PDK, gjatë qeverisjes 2007-201) edhe pse atëherë është bërë për interesa të Kosovës. Në atë qeverisje LDK-ja e ka paguar faturën për gabimet e PDK-së”, ka shtuar Osmani.