Vjena frymoi shqip

Më plot aktivitete kulturore dhe artistike është shënuar “Java e Kulturës Shqiptare në Austri”. Ky aktivitet u organizua nga Këshilli Koordinues i Shoqatave Shqiptare në Austri dhe përkrahur nga Ministria e Diasporës, e Kulturës, Ambasada e Kosovës dhe ajo e Shqipërisë në Austri, Unioni i Bizneseve Shqiptare në Austri, si dhe sipërmarrësit e individët e suksesshëm shqiptarë.

“Është viti i dytë që shoqatat shqiptare, në koordinim me njëra–tjetrën, i ofrojnë publikut vendës dhe diasporës në këtë shtet alpin një program të pasur kulturor”, thuhet në komunikatën për shtyp të lëshuar nga Ministria e Diasporës, transmeton albinfo.ch.

Në kuadër të kësaj jave u organizuan shumë aktivitete, ndër to edhe: koncerti i muzikës klasike nga artistët Anjeza Ismajli, Faik Hondozi, Lorika Ismaili, Zamir Kabe, Chiaki Kotobuki, Rrita Bejtullahu, Zakir Pepaj, Semilit Tafallari dhe grupi i fëmijëve nga Shkolla e muzikës në Vjenë; pastaj shfaqja e filmit “BOTA”, i regjisores Iris Elezi, ekspozita “Përtej Formës” e prof. Skënder Kraja dhe Beskija Kraja, mbrëmja letrare e organizuar në bashkëpunim me Lidhjen e shkrimtarëve dhe krijuesve shqiptarë në Austri “Aleksandër Mojsiu”, koncerti i muzikës folklorike në bashkëpunim me shoqatat “12 Qershori” dhe “17 Shkurti”, turneu i futbollit në bashkëpunim me Ligën shqiptare të futbollit në Austri, si dhe turneu i shahut.

Ministria e Diasporës, në bashkëpunim me Ministrinë e Kulturës së Kosovës dhe atë të Republikës së Shqipërisë, planifikojnë që gjatë këtij viti të organizojnë “Javën e Kulturës Shqiptare” edhe në disa nga qytetet kryesore të botës.