Vjen pjesa e dytë e autobiografisë së Bekim Fehmiut

Prishtinë – Pjesa e dytë e autobiografisë së aktorit të madh Bekim Fehmiu tashmë është gati. Shtëpia botuese “Samizdat B92”, e cila e ka botuar atë, ka njoftuar se libri në serbisht “Blistavo i strasno – drugi deo” (E shkëlqyeshme dhe e tmerrshme – pjesa e dytë) do të jetë në shitje prej sot (e diel), kur edhe hapet Panairi i Librit në Beograd, aty ku do të prezantohet sefte libri i shumëpritur.

Pjesën e parë të këtij libri kjo shtëpi botuese e solli për herë të parë në vitin 2001. Në shqip atë e solli Botimet KOHA, më 2011, një vit pas vdekjes tragjike të tij. Aty Fehmiu shpalos kujtimet për vitet e para të karrierës, për fëmijërinë e rininë.

Përshkruan jetën që nga lindja më 1936 në Sarajevë, flet për jetën në Kosovë, e deri në vitin 1955, kur u pranua në Ansamblin e Teatrit të Prishtinës. “E në pjesën e dytë shkruan për karrierën e tij të suksesshme artistike në ish-Jugosllavi dhe në botë, për zhvillimin si aktor, për karrierën ndërkombëtare, si dhe për përjetimet e tij me shpërbërjen e Jugosllavisë”, raporton B92, bazuar në të dhënat e shtëpisë botuese. “Në vazhdimin e memoareve Bekim Fehmiu shkruan për kohët kur ka luajtur një varg rolesh që ndryshuan historinë e kinematografisë sonë dhe lanë gjurmë të pashlyeshme në rrjedhën artistike botërore”. Sipas kësaj agjencie, Fehmiu shkruan për hapat e parë në skenën e teatrit të Prishtinës, në akademinë beogradase, në Teatrin Jugosllav të Dramës, Atelie 212.(koha)