Vizitat e mërgimtarëve për festat e fundvitit, shpëtim për ekonominë

Fundi i vitit gjithnjë pritet me antuziazëm në Tetovë dhe Maqedoninë Perëndimore, me theks të veçantë nga bizneset. Kjo për shkak se nga mesi i muajit dhjetor fillojnë të vijnë mërgimtarët dhe kjo ndikon drejtpërdrejt në biznesin e tyre.

Kthimi i mërgimtarëve në këtë periudhë është shpëtim për ekonominë tetovare, pasi që ajo varet nga paratë që sjellin mërgimtarët në vendlindje. Agjencitë që merren me studimin e bizneseve të vogla dhe të mesme theksojnë se kthimi i mërgimtarëve ka impakt të drejtpërdrejtë në ekonomitë e vogla.

„Mërgimtarët ende e ruajnë traditën e kthimit në vendlindje për festa të ndryshme që ndikon në ekonominë vendëse“, ka thënë për gazetën “Koha” në Shkup Nebi Jusufi nga Agjencia për Përkrahje të bizneseve të vogla dhe të mesme në Tetovë. Ai thotë se viteve të fundit analizat tregojnë se ka rënie në sjelljen e kapitalit të fituar nga mërgimi në vendlindje, megjithatë për mikrobizneset kjo është një infuzion për të mbijetuar.

Pothuajse të gjitha llojet e bizneseve të vogla në Pollog janë të varura nga ardhja e mërgimtarëve në këtë periudhë, edhe pse ata qëndrojnë jo më shumë se dy javë në vendlindje, megjithatë paratë që i lënë këtu u mundësojnë këtyre bizneseve që të mbijetojnë.

albinfo.ch