Vitia transparente në vendimmarrje, prioritet edhe rinia

Viti – Në kuadër të projektit të OSBE-së për “Fuqizimin e përfshirjes së rinisë dhe pjesëmarrjes së publikut në vendim marrje” në Viti është mbajtur një takim në mes të përfaqësuesve të Komunës së Vitisë, OSBE-së dhe KVRL-së.

Gjatë këtij takimi në veçanti është folur për mundësitë e ngritjes së pjesëmarrjes së rinisë përmes Këshillit të Veprimit Rinor Lokal, por janë paraqitur edhe disa pengesa si mungesa e regjistrimit të këtij këshilli pranë ministrisë përkatëse.

Zv. Kryetari i Komunës së Vitisë, Hasan Aliu duke folur lidhur me rëndësinë që ka shoqëria civile në procesin e vendimmarrjes tha se Komuna e Vitisë ka hartuar një Rregullore mbi Transparencën dhe në këtë do të jetë edhe avancimi i rinisë.

Njëherit Aliu ka folur edhe për vendimin për formimin e komiteteve konsultative .”Në mbledhjen e fundit të Kuvendit Komunal të Vitisë kemi sjellë një vendim të aprovuar për formimin e dy komiteteve konsultative një për personat me aftësi të kufizuar ndërkaq tjetra për pjesëmarrjen e qytetarëve në vendimmarrje, dhe ju njoftoj se konkursi do të jetë i hapur dhe do ta kemi në konsideratë edhe kategorinë e rinisë” u shpreh Aliu.

Drejtori i Qendrës Regjionale të OSBE-së, Ulrich Biffar tha se ekzistojnë disa KVRL të cilat kanë ide dhe dëshirojnë t`i shndërrojnë ato në projekte konkrete dhe për sipas tij kjo është një ndër arsyeje sepse OSBE-ja i përkrah këto këshille. “Arsyeje pse jemi mbledhur këtu sot është që t`i grumbullojmë idetë dhe të shndërrohen ato në projekte konkrete. Dhe vet prezenca e përfaqësuesve Komunal konkretisht zv. Kryetarit është dëshmi se ata janë të gatshëm t`i përkrahjen projektet e duhura” u shpreh Biffar.

Në këtë takim kanë marrë pjesë përfaqësues të KVRL-së të Vitisë si dhe Përgjegjësi i Sektorit të Rinisë, Emrush Azemi ndërkaq si problematik është shtruar mungesa e regjistrimit të KVRL-së për shkaqe të ndryshme e që një nga to është sipas pjesëmarrësve mungesa e marrjes së certifikatave nga tri organizatat të cilat merren me punën e rinisë, pasi sipas tyre në Viti për momentin janë aktiv vetëm dy organizata rinore.

Në fund të këtij takimi janë dhënë edhe rekomandimet konkrete për aktivizimin rinisë dhe regjistrimin e këtij këshilli. /rajonipress/