Vitia mobilizohet fuqishëm për LDK-në, gratë dhe qytetarët rreshtohen pas kandidatëve për deputetë

Viti – Mbështetja për kandidatët e Degës së LDK-së në Viti po vjen duke u forcuar nga dita në ditë, ndërsa takimet e fundit në Viti, Verbani, Sllatina, Kabashi dhe Skifteraj kanë dëshmuar një mobilizim të madh qytetar në prag të zgjedhjeve të 7 qershorit.

Një rol të veçantë në këtë mobilizim po luajnë gratë e Vitisë dhe lokaliteteve përreth, të cilat në takime të shumta kanë shprehur përkrahjen e tyre për kandidatët e LDK-së për deputetë, duke vlerësuar angazhimin e tyre për përfaqësim dinjitoz dhe zhvillim të komunës dhe Kosovës.

Atmosferë entuziaste dhe pjesëmarrje e madhe u regjistrua edhe në Skifteraj, në odën e Ukë Salihut, ku qytetarë dhe aktivistë të shumtë u mblodhën për të shprehur mbështetjen ndaj kandidatëve të Degës së LDK-së në Viti. Gjatë takimit u theksua rëndësia e përfaqësimit të fuqishëm të Vitisë në institucionet qendrore dhe nevoja për vazhdimin e politikave zhvillimore që prekin drejtpërdrejt jetën e qytetarëve.

Pjesëmarrësit vlerësuan programin dhe vizionin e LDK-së, duke theksuar se besimi i qytetarëve po forcohet përmes afërsisë me njerëzit, komunikimit të drejtpërdrejtë dhe kandidatëve që përfaqësojnë vlera profesionale e qytetare.

Nga këto takime është përcjellë një mesazh i qartë se Vitia po hyn në fazën përfundimtare të fushatës me energji të lartë, organizim të mirë dhe besim në sukses, ndërsa përkrahja për kandidatët e LDK-së po shtrihet në çdo lokalitet të komunës.

Përfaqësuesit e LDK-së kanë falënderuar qytetarët për mikpritjen dhe mbështetjen, duke theksuar se kjo frymë mobilizimi përbën garanci për një përfaqësim më të fortë të Vitisë në Kuvendin e Kosovës pas zgjedhjeve të 7 qershorit./rajonipress/