Vitia merret me rregulloret për taksa e gjoba

Viti – Këshilli i Drejtorëve të komunës së Vitisë, ka mbajtur mbledhjen e rregullt ku është diskutuar për propozim rregulloren për taksa, ngarkesa dhe gjoba, planin e integruar komunal 2016-2018, si dhe propozim vendimin për caktimin e lokacionit për ndërtimin e bustit të dëshmorit Hoxhë Jonuz Zejnullahu në zonën kadastrale në Gjylekar.

Në pikën e parë të rendit të ditës, zv.kryetari i komunës Hasan Aliu, tha se është një nga rregulloret më të rëndësishme komunale e cila do të jetë e zbatueshme në periudhë një vjeçare. Edhe hartimi i kësaj rregullore është bërë në mënyrë më të mirë të mundshme, duke i’u nënshtruar edhe udhëzimeve administrative, tha ai.

Ndërsa prezantimin e propozim rregullores e bëri drejtori për Financa dhe Zhvillim ekonomik Ibrahim Rama i cili më detalisht foli edhe për implementimin e saj.

Ai ka precizuar se rregullorja duhet të aprovohet në seancën e radhës së Kuvendit në javët në vazhdim të Ri, me që rast të hyjë në vitin e ri fiskal dhe të filloj implementimi I saj.

Në këtë mbledhje u diskutua edhe për Planin e integruar komunal 2016-2018 që e prezantoi zyrtari komunal Nexhat Arapi, ndërkohë që ky plan ishte i paraparë të kalojë vetëm në këshillin e drejtorëve e jo më tutje. Kurse si pikë e tretë ishte propozim vendimin për caktimin e lokacionit për ndërtimin e bustit të dëshmorit Hoxhë Jonuz Zejnullahu në zonën kadastrale në Gjylekar, që e paraqiti drejtoresha për Kadastër, Pronë dhe Gjeodezi Fatbardha Emini.

Kjo pikë u procedua për në Komitetin për Politikë e Financa që të procedohet më pas për në seancën e radhës së Kuvendit Komunal./rajonipress/