Vitia edhe me një projekt mbi ekonominë e gjelbër, mbrojtjen e ambientit dhe produkteve bujqësore të shëndetshme

Viti – Me qëllim të njohjes për nismat që kanë të bëjnë me realizimin e një projekti që ka për qëllim mbështetjen e ekonomive të vogla, por edhe mbrojtje të mjedisit dhe mbështetjes së fermerëve përmes njohurive mbi bujqësinë organike, kryetari i komunës së Vitisë Sokol Haliti, ka pritur në takim përfaqësuesit e organizatës “Local Solution”, Shqipe Shaqiri Islami dhe Leutrim Germizajn.

Përfaqësuesit e kësaj organizate, kanë dhënë hollësi rreth fillimit të projektit “Gjelbërimi i ekonomisë lokale ne Kosove përmes bujqësisë”, i cili projekt financohet nga Bashkimi Evropian në kuadër te projektit NAGE – Rrjetëzim dhe Advokim për Ekonominë e Gjelbër, që në Kosovë implementohet nga Rrjeti i Organizatave për Zhvillim Rural të Kosovës (NORDK).

Haliti, ka theksuar se ky projekt është tejet i rëndësishëm, si për ekonomitë e vogla po ashtu edhe fermerët që i jep mbështetje për zgjerim të njohurive dhe trajnimeve të ndryshme mbi bujqësinë organike.

Ndërsa Shqipe Shaqiri Islami, shprehu falënderim për bashkëpunimin tejet të shkëlqyeshëm me Institucionet komunale të Vitisë dhe Drejtorinë komunale të Bujqësisë. “Kjo iniciative do të implementohet në Komunën e Vitisë dhe atë të Ferizajt dhe ka për qellim te kontribuoj ne ngritjen e vetëdijes mbi ekonominë e gjelber, mbrojtjen e ambientit, dhe produkte bujqësore te shëndetshme përmes ngritjes se kapaciteteve te fermerëve dhe zgjerimit te njohurive mbi bujqësinë organike”, ka thënë ajo.

Një takim i përfaqësuesve të organizatës “Local Solution” është zhvilluar edhe në zyrën e drejtoreshës se Bujqësisë, Pylltarisë dhe Zhvillimit Rural, Arlinda Sahiti, dhe zyrtare te kësaj drejtorie, me që rast ajo i njoftoi me projektet e realizuara deri më tani, planet për të ardhmen dhe sfidat me të cilat ballafaqohet kjo drejtori.

Po ashtu, drejtoresha Sahiti, ka theksuar se në vazhdimësi po angazhohen si drejtori e bujqësisë, që të mbështesin përmes projekteve të ndryshme nga donatorët dhe subvencionet, fermerët e komunës së Vitisë, që është edhe prioritet i qeverisjes komunale./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).